"Taun 1945 Indonesia merdeka, ari Jepang kalahka ancur dibom. Taun 2012 Jepang ka semi final maén bal olimpiade, ari Indonesia ukur lalajo bari ngacay." Gerentes haté Kang Karja. Guher inyana saré.
Ki angin ngagelebug, lumaku ngurilingan dunya. Aya nu langsam lalaunan nyampeurkeun saung ranggon tempat Kang Karja saré.
"Hahaha, rék teu kitu kumaha atuh, da rahayatna siga silaing. Dibéré waktu 67 taun kalahka dipaké monyah-monyah, loba saré, jeung loba ngimpi." Ceuk ki angin bari ngusapan awak Kang Karja. Atuh Kang Karja beuki tibra.
Rentang-rentang ti kaanggangan Jang Imron leumpang. Nyampeurkeun ka éta saung. Perelek-perelek inyana heuay. Atuh ki angin ngagelenyu.
"Teu anéh." Gerentesna.