Nya, hariring nu ngageuik, nu meuntas jaman ku wirahma purba, geuning jadi kokojo peuting harita. Damar-damar nu hurung muntang ka na poek, bet ngajirim jadi prajurit nu siaga pikeun ngajaga sajarah nu nyumput dina silungna tembang prasasti. Regepkeun haleuangna. Matak murag-murageun mangsa. Ngaitkeun panineungan ka abad-abad pinilih. Sang Prabu makalangan, Citraresmi pangantebna. Lumar geuning nyumput dina caang, lir seuneu nu marakbak di tengah lapang. Nu pucukna jadi silalatu, pakait-kait mangrupa kembang patamanan. Seungitna nyambuang jadi sumanget di tiap lengkah nu hieum. Jadi panuntun poekna kalbu, nu dumuk ngudag waktu.