Salasa, wawanohan jeung Ratna, di Rumentang Siang, satutas acara bubuka FDBS. Rebo, ka Rumentang Siang deui, lalajo Ratna maén drama, bari motrétan (Ratna méré nomer HP). Kemis, nganteurkeun foto ka imah Ratna, terus diajak diskusi ngeunaan pagelaran kamari. Jumaah, nganjang deui ka Ratna, hanjakal keur teu nyampak. Saptu, ngajak Ratna ka Rumentang Siang, bisa ngobrol rada lila, balikna dianteurkeun. Ahad, balaka ka Ratna yén uing neundeun haté (Ratna teu langsung méré jawaban). Senén, aya SMS ti Ratna: “Mending urang sosobatan waé.” Salasa, uing ngalanto deui ka Rumentang Siang, sugan meunang gaganti Ratna.