Ku Tatang Sumarsono
“Wantuning hirup waluya
jembar haté padang pikir
tumampi teu ngarasula
katangtosan ti ajali
tandaning mahluk laip
tur tawekal ka Nu Agung
pasrah iklas sumerah
putusan Nu Maha Adil
Gusti Alloh hamo nanggeuy di bongkokna”
Duka geus sabaraha kali, Ani nembangkeunana. Tapi operator studio rékaman keukeuh bangun tacan sugema. Ka peutingnakeun karék dianggap final.
Pleng lila teu panggih jeung Ani. Waktu tepung deui, beungeutna asa kanyos. “Nuju seueur cocobi. Ah, nya pasrah wé. Badé kumaha deui tuda. Sok dibangbalérkeun bari nembangkeun guguritan kénging Akang: wantuning hirup waluya, jembar haté padang pikir, tumampi teu ngarasula, katangtosan ti ajali, tandaning mahluk laip, tur tawekal ka Nu Agung ...,” sora Ani rada peuyeuh.
Kuring ngahuleng. Dina batin nu pangjerona kedal halon, “Gusti, mugi abdi ditebihkeun, tina ketak panyajak, anu ngucah-ngacéh ungkara kalimah, tapi tara dipilampah ....”