Update: 29 Maret 2012 11:50:20

Dua Minggu Saméméhna

Ku Sanjaya Dhipa

19 taun katukang, mimiti kataji ku manéhna. Resep kana laguna, bogoh kana camperenikna. Basa manggung di Alun-alun Panjalu, nu lalajo pagelek-gelek hésé usik. Salaku budak, urang lembur, ukur bisa seseledek néangan tempat nu merenah keur lalajo kamonésan manéhna ngahaleuangkeun lagu-lagu pop Sunda. Lagu-lagu nu mindeng diputer di Radio Buana Jaya Ciawi. Enyaan, mani nyurup antara sora jeung rupa téh. Matak, isukna langsung nyuratan, hayang wawanohan.
19 taun lilila, surat henteu kungsi diwalonan. Tug nepi ka diparengkeun patepung minggu kamari. Wawanohan, tur henteu poho nanyakeun balesan surat. Duka… teu ngarti, bet ngajajap, nganjang ka imahna, disuguhan. Leuwih teu ngarti, isukna ngahajakeun nganjang deui. Pagétona ngajak adu nyali flying fox. Kigétona ngajak itu, ngajak ieu.
“Kumaha, Kang? Serius akang téh?” gebeg. Pananya éta anu dipikainggis téh. Mukenana masih can dibuka ti saréngséna ngamamum ka kuring. Teup, neuteup sapasang socana. Baheula kataji ku sorana jeung bogoh kana rupana. Ayeuna, kakara babarengan saminggu, bet ngarasa tingtrim mun neuteup socana, bet ngarasa betah nyanghareupan sikepna. Tina sorana, kana rupana, terus kana jiwana. Asmara nyaliara minuhan dada. Biduan nu ti baheula dipidangdam, ayeuna keur nganti putusan. Umurna leuwih kolot tilu taun. Tapi lain éta pasualanna. Paduli teuing najan umur béda 20 taun ogé ari bogoh mah. Duh… naha leuir pisan atuh patepung téh? Teuing kudu kumaha nyaritana, yén dua minggu deui kuring geus paheut rék kawin. Malah ondangan geus disalabarkeun.***

----------------------------------------------------------------keur RP di Pangumbaraan

Koméntar kana ieu Fikmin:
  1. Nandang Darana: Dua bulan ti harita, maca fikmin dipirig ku "serat salira"..
  2. Dadang Soekanda: Leuh... kumaha atuh ...?
  3. Maspri Dkc: Nu ieu jantenkeun nu ngora bari nyamuni....hehe
  4. Erna Rusnawati: leuh kang pancegkeun pamadegan!
  5. Dhipa Galuh Purba: Ňandang Darana: panineungan Ibu Euis Komariah eta mah....
  6. Dhipa Galuh Purba: Dadang Soekanda: nyambung ka bagean ka dua....
  7. Dhipa Galuh Purba: Maspri Dkc: teu rame pami lalakonna kedah kitu mah....
  8. Dhipa Galuh Purba: Erna Ruswati: fiksi fiksi Teh....
  9. Dadang Soekanda: Kang Dhipa Galuh Purba, wios simkuring we tokohna dina carios nu kadua mah...
Ngeunaan Ieu Naskah:
Naskah lianna karya Sanjaya Dhipa
  1. Basa Lalajo Bajidoran Namin
  2. Palakiah Eureun Ngaroko
  3. Pajaratan Cinta Xi
  4. Pajaratan Cinta
  5. Dua Minggu Saméméhna
  6. Gombal
  7. Péso
  8. Pajaratan Cinta