Ku Godi Suwarna
Aya hiji wayang golék guligah luhureun bupét. Gatotkaca katelahna. Saban wanci mencrong kana gambar leuweung nu dipajang dina dingding. “Aing teu hayang jadi wayang,”cénah bari ngalimba. “Darma wawayangan baé! Raga taya pangawasa! Wayahna, ‘Jang!” cék wayang kulit Bima nu dipaku kana témbok. Televisi keur nayangkeun rajapati, ngawartakeun aya hiji Dalang moyan dijagal duka ku saha. “Aing hayang jadi tangkal,” Wayang Golék ngagerendeng bari anteng nenget-nenget gambar leuweung. Wayang Kulit ngahuhuleng. Rus-ras. Ras ka tegalan upluk-aplak. Ras kana jukut-jukutna nu ngemploh. Ras ka dirina harita. Wayang Kulit rumahuh. “Aing hayang jadi leuweung!” Wayang Golék ngagerem, aya getih nu geus garing na sampingna. Kapireng sora nu kapapaténan keur nginghak di jero kamar. Patung Buda dina méja ukur imut bari peureum.