Regot kana kopi, cetrék kana tipi. Glek, sebrot! Kabesékan. Si Geulis Najwa keur dicokcrok polo ku narasumber. Getih ulawéran. Rey, sebel. Gancang mindahkeun saluran, infotainment. Calangap, nempo Julia Péréz pinareupna keur ditambul Ketua Partéy, neureuy ciduh. Pindah cénel kana tipi warta hiji deui. Soak, neuleu anggota déwan keur silih-hakan. Getih ngawahangan. Pindah kana kartun, Si Masha keur ngégélan Misha. Getih deui waé. Ya Alloh, ngimpi kitu ieu téh? Ngalempréh. Rét ka pamajikan. Jenghok. Matana hurung, beungeut pias, buuk ngarewig. Biwirna garetihan. Awak ngadadak ngagibrig, leuleus satulang sandi. Kakara kajeueung budak ngagolér dina karpét. Dada gorowong ilang jantung. Beledug! Tipi bitu. Tina haseup ngajleng Angelina Jolie, samagréng. Bedil kaliber 45 ngabekas. Sirah pamajikan bejad.“Hayu!” pokna Jolie.“Ka mana?”“Cuang nyalametkeun umat,” ngadilak. Sérését.“Pakarang?”Jolié ngalungkeun bungkusan. “Tah!”Buru-buru dibuka, goréhél téh, mesin tik jeung…, kondom?***