Update: 06 Agustus 2016 02:59:25
Login ku Akun Facebook

Pangréana Fikmin

Pangaléwohna

Koméntar ti Kanca

Ahad, 19 Maret 2017 16:02
Yusuf S. Martawidénda: " Naha akun sim kuring dina web ieu janten aya dua. Nu hiji namina : Yusuf S Martawidenda Nun hiji deui namina : Yusuf S. Martawidénda nu hiji teu ngangge curek. Nuhiji deui ngangge curek dina e-na. TAPI NU LENGKEP DATA PROFILNA AKUN NU E-NA TEU NGANGGE CUREK HATUR..."
Salasa, 14 Maret 2017 16:22
Abdul Haris: " Alhamdulillah, kotrétan téh, tiasa katawis deui dina web. Hatur nuhun, Kang Dan...."
Kemis, 16 Fébruari 2017 12:29
Hamim Wiramihardja Coèlho: " Naha sesah geuningan bade ngeusian profil teh......."
Senén, 16 Januari 2017 06:47
Kang Mohen: " Sampurasuun..."
Ahad, 08 Januari 2017 23:29
Roni Rohendi: " Assalamualaikum, ngiring ngaderes palih..."
Rebo, 04 Januari 2017 07:41
Aris Siswanto: " ..."
Rebo, 04 Januari 2017 03:02
Elan Sudjanamihardja: " datang katimgal tarang tea meureun nya. nya bade ngiringan didieu yeuh da geuning ari nyiar pangarti mah tue aya watesna, boh umur atanapi tempat, sugan we aya paedah sareng mangpaatna. sim kuring ti aachen, jerman watesan ka walanda sareng belgia, elan sudjanamihardja, ari di aachen mah barudak mahasiswa nyarebatna..."
Ahad, 01 Januari 2017 22:33
Ridwan Melodian Plain: " Sampurasun..."


Flash Fiction jeung Micro Fiction

Endah Dinda Jenura | Ahad, 27 Januari 2013 05:49
Bagikan ka Lapak Facebook
FBS
Flash Fiction [Gambar/Ilustrasi: Internet]

FLASH FICTION

Istilah jeung Sajarah 

Istilah flash fiction mimiti aya taun 1992 tina judul buku antologi nu judulna Flash Fiction: Seventy Two Very Short Stories. Dina panganteur, editor nyebutkeun yen nu dimaksud flashfiction teh nyaeta carita nu tamat ditulis dina 2 kaca majalah ukuran digest (majalah Intisari meureun di urang mah, atawa Kawanku). 

Flash fiction akarna cenah tina dongeng-dongeng sato (fabel) Aeosop nu tuluy dituturkeun ku Saadi (The Gulistan), Boles?aw Prus, Anton Chekhov, O. Henry, Franz Kafka, H.P. Lovecraft, Yasunari Kawabata, Ernest Hemingway, Julio Cortázar, Arthur C. Clarke, Ray Bradbury, Kurt Vonnegut, Jr., jeung rea-rea deui. Breng weh.  

Dina internet flash fiction sumebar lantaran aya kabutuh pikeun maca karya fiksi nu singget tur padet. Salian di internet, flashfiction oge maneuh dipublikasikeun di sababaraha hiji majalah cetak. Malah, ti taun 2007 tug nepika kiwari, diayakeun Micro Award, nyaeta pangajen nu khusus dibikeun ka pangarang flashfiction. 

 

Kamonesan

Beh dieu, aya kamonesan anyar. Flash fiction teh diwilah-wilah deui jadi misalna:

  • 55 (fifty five) Fiction, nyaeta flashfiction nu jumlah kecapna pas 55 (teu kaasup judul);
  • 69er (sixty-niner), nyaeta flashfiction nu jumlah kecapna pas 69 (teu kaasup judul);
  • Drabble, nyaeta flashfiction nu jumlah kecapna pas 100 (teu kaasup judul);
  • 369, flashfiction tematis nu diwangun ku 3 sixty-niner (69er), masing-masing 69er mibanda judul nu beda;
  • jeung sajabana.

Vignette

Nepika ayeuna, aya keneh padungdengan ngeunaan naha vignette (dibaca vinyet) kaasup flash fiction atawa lain. Vignette teh tulisan pondok nu ngagambarkeun hiji kaayaan, momen, tempat, objek atawa karakter nu biasana aya dina naskah drama/teater, carita sketsa, jeung puisi. Vignette mucunghul ku pangaruh adegan-agegan dina film atawa video kontemporer. Salah sahiji vignette nu mashur teh nyaeta tulisan Hemingway nu judulna Sapatu Orok: "Dijual. Sapatu orok. Can kungsi dipake."

------------------- 

MICRO FICTION

Micro Fiction teh carita pondok nu diwangun ku 100 kecap atawa kurang. Di sawatara media online, micro fiction malah diasupkeun ka rohangan Puisi.

Micro fiction=puisi-prosa? Teu pisan-pisan. Puisi-prosa mah sajak nu ditulis mangrupa kalimah-kalimah nu teu diwengku ku jumlah kecap tur teu kudu mangrupa carita. Puisi-prosa bisa wae ngan ngagambarkeun warna layung atawa rupa kabogoh nepika tamatna. Teu kudu aya plot. Teu kudu aya kajadian.

Sedengkeun Micro fiction mah butuh plot jeung kajadian sanajan singget jeung padet oge. Kumaha tehnik nulisna? Urang bisa milih salah sahiji:

1. Saeutik tapi Patri

PANGOJAYAN -- Sanajan awakna parikagilaeun siga cucunguk, Bangsa Yuggothian kawentar pinter jeung someah. Jadi, mahasiswa-mahasiswi ti planet Bumi nu dikirim studi banding ka Planet Yuggoth teh teu burung betah. Hanjakal, rumaja-rumaja Bumi mah pangedulan, gawena teh ngan ngalabring we jalan-jalan. Hiji poe, maranehna nempo aya pangojayan gigireun gedong sigrong. Teu talangke, gejebur we alancrub, silih simbeuh, tingjerewet sukan-sukan. "Kieu geuning cai di Yuggoth mah, semu encer jeung nyecep pisan karasana kana kulit..." ceuk saurang. Kakara sanggeus sababaha Yuggothian nu aya di dinya tingjorowok nitah hanjat, mahasiswa Bumi nyaho, 

singhoreng nu disangka pangojayan teh septic-tank Yuggothian. 

Bagean-bagean carita nu teu ditulis dina carita di luhur teh loba, upamana: naek naon ti Bumi ka Yuggoth? Sabaraha hiji jumlah mahasiswa nu dikirim studi banding teh? Karuliah dimana eta 

mahasiswa teh? Saha ngaran mahasiswa/mahasiswi nu ngomong cai Yuggoth semu encer jeung tiis? Jrrd. Tapi urang teu dibere nyaho jeung teu butuh nyaho. Nu penting mah inti caritana katewak. Aya plot. Aya kajadian. 

Tina carita Pangojayan bieu katingali yen loba bagean-bagean carita nu ngahaja dileungitkeun. Praktisi micro fiction kudu tega miceunan bungkus carita nepika ceuk paribasana mah, lauk teh kari cucukna. Teangan verb nu seukeut, tong loba teuing adjektif. Pilihan kecap-kecap keur carita siga panyajak milihan kecap keur sajakna.

 

2. Gagasan Basajan

POE SALASA -- Mimitina mah dina tonggongna aya totol hidung sagede dampal leungeun. Dua poe ti harita, totol-totol eta ngalobaan, minuhan awak. Teu lila tina kulitna kaluar bulu koneng meles, jol cakar, ranggeteng sihung. Poe Salasa, Cecep geus sampurna mangrupa maung kajajaden! Peutingna ngalenghoy kaluar imah muru leuweung teu jauh ti dinya, terekel Cecep nu ti baheula hayang jadi maung teh naek tangkal caringin, tuluy depa nyerangkeun sabudeureunana. Ret ka palebah tangkal kadu, kasampak Mang Ujang, tatanggana, keur ngagantung dina dahan, seuri ngagupayan ku leungeun kalongna. 

Gagasan carita di luhur basajan pisan. Kumaha lamun hiji jelema bisa jadi sato? Naha jelema nu sejen bisa jadi sato oge? Gagasan eta teu cukup keur dijieun novel atawa carpon. Bisa wae dijieun fiksimini nu panjangna 500-an kecap, tapi jang naon? Teu kudu dicaritakeun naha Cecep jadi maung kajajaden atawa ti iraha mang Ujang jadi kalong (kajajaden). Euweuh nu paduli. Nu penting mah naon nu karandapan ku nu boga lakon (Cecep) dina Poe Salasa eta.

 

3. Aheng

JURIG -- Kedeprek. Kedeprek. Belasan kuya goreng sopak jeung karijut asup ka kamar, ngajungjurigan. Tina batok-batok nu siga tapak nyacag tingpecenghul bisul nanahan nu tingpeletuk bucat, hanyir minuhan rohangan. Kedeprek. Kedeprek. Beuki deukeut. Beuki deukeut. Simbut nu ngaharuduman awakna lalaunan lesot dibedol ku sungut-sungut hideung bau laut. Manehna murungkut bari ngalengis, "Ampuuunn... Hampuraaaa...Teu kahajaaaa... Aduh, ulah direcak... Embung, lain kuring nu ngamimitian duh Gusti, ampuuuunnn... Hampuraaaa..."  Kuya nu panggedena ngadeukeutan, tungkul mencrong manehna, beuheung elok-elokan, sora siga golontor cai keran kaluar tina genggerongna...

Aya sawatara carita nu mibanda plot nu datar, misalna dijungjujurigan. Kabeh jelema pasti sieun dijungjurigan. Tapi naon bedana dijungjurigan nu ieu dibanding dijungjurigan nu sejen? Plot nu datar wayahna kudu dirojong ku kaahengan (dina carita ieu, dijungjurigan kuya).

 

4. Moralitas

DARIUS SINATHRYA -- Dalapan bulan lilana awak Dudi Juragan Minyak nu rangsak alatan tabrakan dioperasi bedah di luar negeri. Supaya teu sulah siga baheula, hiji-hiji akar buuk Dudi dipelakeun deui gemet pisan ku dokter ahli. Kuku nu kekeongeun diganti. Daging dikaput, raca ditutup kulit sintesis, tapak budug dilaser, tulang dikuatan, lemak disedot, otot ditambah, kulit dirantengkeun deui. Minangka operasi panungtung, beungeut Dudi Juragan Minyak nu asalna siga Cepot diropea jadi siga Darius Sinathrya. Mulang ka Indonesia, sapoe sanggeus dibere eunteung, awak Dudi ngagulayun. Ceuk surat wasiatna: Aing mah hayang dibenerkeun! Lain diganti! 

Ulah mapatahan nu maca di awal carita. Teu kudu ngajentrekeun "Ulah udud bisi kanker!" "Kudu gemi sangkan beunghar!" jeung sajabana. Tugas praktisi micro fiksi, palebah dieu, sigana ngan ngaguntingan kalimah-kalimah nepika ngajurungkunung jadi wangun carita nu efektif. Boh prakisi micro fiction boh panyajak sarua kudu imeut nitenan kecap-kecap dina karyana. 

------------------------------------

Catetan: Sigana moal haram ngayakeun Fiksi Tujuh Kodi atawa Fiksi Genep Losin oge. Fikmin Opat Pada? Fikmin Gunem? Fikmin Pisan? Fifikminan? Bebaskan.   

Kintunkeun Koméntar

Ngaran
Alamat email
Alamat Web
Koméntar
Tulis Kode: