Update: 06 Agustus 2016 02:59:25
Login ku Akun Facebook

Pangréana Fikmin

Pangaléwohna

Koméntar ti Kanca

Ahad, 19 Maret 2017 16:02
Yusuf S. Martawidénda: " Naha akun sim kuring dina web ieu janten aya dua. Nu hiji namina : Yusuf S Martawidenda Nun hiji deui namina : Yusuf S. Martawidénda nu hiji teu ngangge curek. Nuhiji deui ngangge curek dina e-na. TAPI NU LENGKEP DATA PROFILNA AKUN NU E-NA TEU NGANGGE CUREK HATUR..."
Salasa, 14 Maret 2017 16:22
Abdul Haris: " Alhamdulillah, kotrétan téh, tiasa katawis deui dina web. Hatur nuhun, Kang Dan...."
Kemis, 16 Fébruari 2017 12:29
Hamim Wiramihardja Coèlho: " Naha sesah geuningan bade ngeusian profil teh......."
Senén, 16 Januari 2017 06:47
Kang Mohen: " Sampurasuun..."
Ahad, 08 Januari 2017 23:29
Roni Rohendi: " Assalamualaikum, ngiring ngaderes palih..."
Rebo, 04 Januari 2017 07:41
Aris Siswanto: " ..."
Rebo, 04 Januari 2017 03:02
Elan Sudjanamihardja: " datang katimgal tarang tea meureun nya. nya bade ngiringan didieu yeuh da geuning ari nyiar pangarti mah tue aya watesna, boh umur atanapi tempat, sugan we aya paedah sareng mangpaatna. sim kuring ti aachen, jerman watesan ka walanda sareng belgia, elan sudjanamihardja, ari di aachen mah barudak mahasiswa nyarebatna..."
Ahad, 01 Januari 2017 22:33
Ridwan Melodian Plain: " Sampurasun..."

Kalénder Fikmin • 01 Januari 2012 (62 Naskah)


WAKTU

Kénging Jejen Jaelani W
Dipidangkeun dina lapak 01 Januari 2012 23:56:28

tu tekna jarum jam nu ngadaplok na tembok, teu weleh marengan dag dig dugna jajantung bari jarum nu panjangna nu weleh nunjuk kana ulat nu ranteng ku garis kasimpe

DIKANTUN TUGAS

Kénging Abah Sarjang
Dipidangkeun dina lapak 01 Januari 2012 23:46:21

Guratgurat simpé raca na kongkolak soré, raga nu nangtung dirurub layung, launlaun disosoéh mongkléng. Peuting nojoskeun mangréwu paku na jero kalbu.

Ngaregéh manéhna nutupkeun hordéng, di saluareun jandéla angkeub beuki hideung, sakapeung kilat nagabarasat, ngirim kalangkang nu dipicangcam.
Aya hanyir getih kaangseu lebah sarigsig, satékah polah dipungkas ku narik nafas, hawarhawar guludug ngagelegerkeun mortir lebah jantungna.

“Geura mulang Kakang.” Ceuk manéhna, lalaunan humandeuar, bari ngusap beuteung nu bureuyeung.

BENTANG

Kénging Liman Sanjaya
Dipidangkeun dina lapak 01 Januari 2012 23:43:14

mulang ti langit. tilu bentang dikeupeul pageuh. inggis ragrag atawa katohian ku batur. poho kana kacape, gura-giru muru sawangan manehna. rek melak ieu bentang sangkan nambahan kaendahan. sangkan jadi tetengger yen kuring kungsi nganjang. teu kacatur di jalana, anjog oge ka tempat nu saban mangsa ngeusian ieu rasa. bentang diilikan deui, bisi kumaonam. tuluy luak-lieuk ka sabudeur ieu rohang. geuning endah taya papadana. ngan hate ujug ngaleketey. rewuan bentang geus nyampak. patingkaretip ngaguar cahya aheng. cahya nu ngiwat pangacian. kuring teu inget di bumi alam.

WAKIL RAYAT VSTUKANG CUKUR

Kénging Iwan Hanjuang
Dipidangkeun dina lapak 01 Januari 2012 23:33:26

Kunaon maneh titadi ngan ngagulang gaper hulu aing,lain geura prak nyukuran ??
“ Punten Bapa abdi hoyong terang, sirah bapa teh géning kopong teu aya eusian”

PUN UWA

Kénging Apoedy Sarah Ihsan
Dipidangkeun dina lapak 01 Januari 2012 23:10:03

Kuring ka anjeuna teh, teu dulur dulur acan. Ngan sok ngabasakeun "pun uwa", da resep pisan ka anjeuna teh anu berehan, teu koret ku elmu jeung pangarti. Malah mah sok dijeujeuhkeun ku mangpirang pilihan. Kalan kalan kuring ge sok di ajak ngurilingan dunya nu can ka sorang. Janten asa pantes mun nganuhunkeun ka anjeuna.. "pun uwa" google... *3.

PIKIRANEUN

Kénging Dedi Rosala
Dipidangkeun dina lapak 01 Januari 2012 23:09:15

kembang seuneu paburincay pating burinyay mancawura ka awun-awun
demi mapag taun..
kembang gadung mah semu nu alum
kembang tanjung bangun nguyung
kembang beureum haleungheum
kembang wera teu mirosea
kembang asih bet meupeurih
taya mendingna
mungguhing hirup ...
pikiraneun!

NAGARA KERTAGAMA

Kénging Kus Wanda
Dipidangkeun dina lapak 01 Januari 2012 22:58:24

Miripis ti Jombang kénéh. Maksakeun ngadius najan teu maké jas hujan. Moal kabagéan acara inti mun kudu ngiuhan heula. Bisa-bisa nepi Surabaya liwat Isya. Lebah Trowulan hujan ngabadagan. Ngagebrét lir dicicikeun. Kapaksa motor nyisi. Ngiuhan hareupeun toko nu geus tutup. Di dinya nyampak aya saurang. Aki-aki. Sigana sarua ngiuhan. Sanggeus pabetem-betem rada lila kuring nyarita ngawanohkeun. Ujug-ujug si aki ngomong "Dupi salira ti nagri Sunda, kitu?". Can pok ngajwab, si aki neruskeun "Boga kapanasaran ka urang Sunda téh. Aki baheula tukang nulis kitab. Basa meunang béja Maharaja seja ngadahup ka Putri Dyah Pitaloka aki geus ngararancang pikeun nulis kitab nu eusina biografi Maharaja sareng Permaisuri Dyah Pitaloka. Hanjakal teu tinekanan...." si aki nyaritana bangun hanjelu. "Ke...dupi aki téh saha téa, nya?" kuring panasaran. "Ari ngaran paméré kolot mah Acarya Nadera". Gebeg!. "Empu Prapanca..!" kuring ngagorowok. Sakiceup si aki geus ilang tina paningal.

CAN DIJUDULAN

Kénging Asep Komara
Dipidangkeun dina lapak 01 Januari 2012 22:42:19

Fikmin # BEAS KETAN #

Manehna datang dina peuting walimahan. Mawa bokor nu dieusi beas ketan. Kuring teu wasa nampanan.
"Kadieu atuh, Nyai..", indung ngagupayan.
Manehna mung werat unggeuk, bokor ditatangkeup keneh, tuluy emok nyorangan , teu unggut kalinduan.
Sajeroning tawasulan, hate kumejot hayang mindo dikir nu kedal, malar sarua jeung lobana siki beas ketan.
Keur ngawuran sesa panineungan.

FIKMIN

Kénging Dedi Rosala
Dipidangkeun dina lapak 01 Januari 2012 22:38:11

Bewara"
Bewara ka sakumna.....!!
Diperyogikeun pisan boh istri atanapi pameget nu gaduh daya tarik
kanggo dilebetkeun kana sampul Yasin edisi taun enggal. Diantos!!

AING

Kénging Dedi Rosala
Dipidangkeun dina lapak 01 Januari 2012 22:12:51

Pangawakanana jangkung gede, weweg,ampeg tur seseg.Teu boga pacabakan nu matuh, pagawean jeung kabisana ngan ukur gelut jeung gelut bae. Nu matak pantes disebut 'jeger' ge di Terminal eta mah, taya nu waranieun ngaganggu.
Sakali mangsa manehna siga nu manggih kakeuheul duka teuing pedah naon, bari mesat bedogna ngadon nangtang ka anu araya di dinya: "Saha nu wani ka aing ka hareup, maju, majuu.....?!!",pokna tarik pisan. Kabeh nu araya di dinya pada muringis. Si Juju nu keur jongjon ngaladangan cucunguk keur parab curinghak, kadengena bet siga aya nu ngageroan ieu teh? Teu mikir panjang si Juju gura-giru bari mawa cucunguk daganganana nyampeurkeun ka manehna: "Ieu yeuh cucunguk tea...!!",bari song diasongkeun. Si Jeger molohok mata simeuteun, satuluyna ngabecir teu baliik deui. Si Juju pada muru, sarerea nganuhunkeun. Bakating ku bengong si Juju ngomong: "Aing tea... atuh", pokna.

NAGA

Kénging Toni Lesmana
Dipidangkeun dina lapak 01 Januari 2012 22:11:33

Sabada ngurilingan saban kandang di kebon binatang. Aya nu tuluy nguyung. Ngajak muter deui nitenan saban kandang. Meunang sabaraha balikan kalah beuki murukusunu. "Geuning teu aya naga?" pokna bari malaweung. "Naga mah dongeng." tembal teh keukeuh. Manehna ngareret bari kerung. "Di mana atuh ari naga? Naha nu sanesna aya, tapi dipilari kalah teu aya." pokna deui bari ngalendean. "Naga mah dina buku." tembal teh bari dipangku. Manehna nyumput kana harigu. "Apan urang ge dongeng. Sagalana oge dongeng. Mun naga teu aya di kebon binatang. Urang ge panginten teu aya di mamana. Mung aya dina buku." harewosna beuki jero asup kana dada. Kana kebon binatang nu nyamuni.

TAROMPET

Kénging Caca Danuwijaya
Dipidangkeun dina lapak 01 Januari 2012 21:57:22

"Gandeng atuh niupan tarompet wae!"
"sakali ewang atuh ngagandengkeunana, kamari maneh ngagandengkeun urang"
"ngagandengkeun kumaha, wajar we taun baruan;pasti gendeng. naha ari maneh kamari kamana taun baruan"
"pan gawe lembur teu sempet niup tarompet, matak ayeuna we niupan tarompet nepi ka gandeng meh adil sakli sewang"

SASALAMAN

Kénging Rafi Suherman
Dipidangkeun dina lapak 01 Januari 2012 21:45:32

Poe ieu loba jalma sung song ngajak sasalaman
" selamat taun baru" cenah
ukur dibales ku renyu, atuda naon nu kudu disalametkeun ari taun baru ukur direuah-reuah lampah awuntah, nu ngarinum alkohol, nu nyeungeutan kembang api, malah nambah jangar kana sirah da garandengna ampir nepika subuh
" kamana ari akang wengi teu katinggal, rame babakaran sareng nyeungeutan kembang api" ceuk saurang tatangga
" aya di mushola ngijir diri" tembal teh.

ASTAGFIRULLAHALADZIM

Kénging Bening Selaksahati
Dipidangkeun dina lapak 01 Januari 2012 21:29:11

Ting baleledagna sora mercon jeung kembang api nu murub mubyar di malem taun baru tadi peuting, matak ngageder jajantung, matak nambah nyanyautan nu nyeri huntu, mawa bencah nu ngumbar nafsu, ting arengklak, ting gorowok, tarompet patarik- tarik siga hayang ngelehkeun sora makhluk nu sapanjang waktu dzikir jeung muji syukur kanu Maha kawasa. Para malaikat ngajengkat, malaikat Rahmat ngorejat ninggalkeun manusa- manusa nu resep dilaknat.
Ya Rabb mugia abdi sadayana warga nagara Fikmin kalebet jalma - jalma akhli tobat , akhli syukur, dilimpahan rahmat sareng hidayah salamina, Amiin.

FIKMIN "BATUK

Kénging Herdi Pamungkas
Dipidangkeun dina lapak 01 Januari 2012 21:27:54

Ras inget kanu jadi akina. Panonna ngadadak beueus. Paméntana anu panungtung nongtoréng kénéh dina kekendangan. Teu pira hayang udud daun kawung bako tampang. Dokter keukeuh nyarék. Ulah bisi maot. Buktina dikurebkeun angger. Asa dosa. Malem taun baru manéhna kebat ka astana. Néangan daun kawung jeung bako tampang teu manggih, aya gé roko kéréték ngan teu maké kuda.
“Ki, hampura uing teu manggih karesep aki. Sugan ieu katampi sabos udud, ieu mah langkung raos. ”Luk tungkul neuteup tetengger, reup meureumkeun panon, kadua leungeuna diangkat kaluhur kawas enya ngadu’a.
Bray beunta deui, jung cengkat maksudna arék mulang. Matana neuteup ka lebah siraheun, roko teu katempo.
“Kamana rokok?” manéhna mencétan tarang.
“Ohek..oho..oho..” kadéngé sora nu batuk.
“Euleuh, saha nu batuk?” panénjona teu ingkah, lebah siraheun aya haseup bodas kaluar tina liang anu sagedé curuk.
“Déwék anu batuk mah, kéhéd! Ongkoh silaing ngirim udud...teu rido?” cék nu ti jero kuburan.
“Aéh...sanés teu rido.” ngarénjag. “Panginten atuh haseupna ngelun,”
“Haseup ngeulun mah sanés aki abdi. Nepangeun Nénéng?” haseup téh jadi mojang geulis.
Manéhna kagét, ningalian leungeun bari ngajembélan pipi, bisi ngimpi. Lain. Nyata. Euweuh sasaha ieuh mojangna gé bangun méréan geuntak digabrug digaléntoran.
“Montong hareupeun aing atuh, kéhéd! Teu sopan.” si aki malédog ku kuntung kana punduk.
“Waduh, panas Aki!”

HORDÉNG KAYAS

Kénging Cassa Grande
Dipidangkeun dina lapak 01 Januari 2012 21:24:25

"Réhé...!" Samalah parat nepika imahna. Ukur sora hordéng nu ngérélék, nutup jandéla. Méméh asup, salambar buuk Lastri murag. Buru-buru dirawél, laju dikeukeup lebah harigu. "Kuring téh, sulbi anjeun" Buuk Lastri ngaharéwos. "Geura bawa Kuring, Kang." Buuk Lastri karasa haneut, nangkeup kana harigu. "Iraha Kuring bisa Pok...!?"

CIMATA MUNGGARAN

Kénging Ganjar Kurnia
Dipidangkeun dina lapak 01 Januari 2012 21:23:01

Taun anyar téh, cenah harepan anyar. Nu matak, basa tatanggana ngajakan dagang tarompét ka Bandung, manéhna kacida giakna. “Urang ngéclok waé heula, duit panas gé teu nanaon, engké ogé untungna bakal nikel” ceuk babaturanana. Saget. Isukna milu indit ka kota. Sapeuting jeput nyieunan tarompét di émpér toko. Tanggal 31 Désember cunduk. Tarompét mimiti ditatawarkeun. Lain manéhna wungkul anu dagang. Aya puluhna, ratus malahan meureun réwu di sakuliah kota mah.
Waktu beuki nyedek ka tengah peuting. Tarompét teu acan aya nu payu. Langit anu awalna béngras, teu kuhanteu jadi ceudeum, terus hujan ngagebrét. Badag pisan. Manéhna lumpat arék ngiuhan. Tisolédat. Tarompét dagangan leupas, terus palid kabawa caah cileungcang, kagéléng ku mobil, asup kana kolongna.
Mangsa tarompét kabungahan taun anyar ditariup dina jam dualas panceg, di sisi jalan aya nu ngahodhod kabulusan. Teuteupna kosong. Cimata munggaran nu ngeclak dina taun 2012, bedah ngabanjiran pipina

TILANG

Kénging Neni Hendriati
Dipidangkeun dina lapak 01 Januari 2012 20:58:03

Na, ngimpi naon, bet dipiriwitan pulisi? Tadina rek kabur, ngan eleh rikat...motor pulisi geus malang hareupeun pisan. Atuh teu mangga pulia, kuring nurut waktu dititah turun.
"Bisa dilihat kelengkapan surat anda?" pokna teugeug.
"Bisa."
Teu talangke, kuring muka loket, kusiwel ngaluarkeun SIM jeung STNK, song dibikeun. Tuluy diilikan bari unggut-unggutan.
"Kenapa gak pake helm?" pulisi nunjuk sirah kuring. Gebeg, gap, sirah dirampa. Astagfirulloh, na, poho kabina-bina!
"Hilap, Pa!" kuring ngelemes.
"Ini aturan bagi pengendara yang tidak memakai helm," pulisi ngaluarkeun angka.
Beu? Kuring muka loket, nyampak duit duapuluh rewu, salambar-lambarna.
"Damey, Pa," pok teh bari ngusiwelkeun duit nu ngan salambar-lambarna kana leungeunna.
Pulisi tambah kerung.
"Uangnya kurang!"
"Teu aya deui, Pa," pok teh ngalengis. Nempo kuring ngalengis, pulisi karunyaeun.
"Silakan lanjutkan perjalanan anda, tapi motornya didorong saja, karena anda tidak memakai helm!".
Jadol! Panas-panas kieu, duit ngalayang, katambah kudu ngadodorong motor...

NU KEUR HARIWANG

Kénging Ambuna Kaka
Dipidangkeun dina lapak 01 Januari 2012 20:21:35

Sikleus lima taunan. Beurit ngagalaksak méméh nepi ka usumna panén. Keur Mang Oman mah kaayaan saperti kieu téh wuwuh nambah rungsing kana pikirna. Kapan ukur maro nyawahna téh. Enya gé kaperluan nyawah téh dimodalan ku dununganana tapi pan henteu haratis. Cunduk mangsana panén beubeunangan Mang Oman mangrupa sésa tina potongan waragad salila nyawah téa. Geus kateguh, pasti hasilna teu sabaraha. Lian ti kitu, Mang Oman kudu toh-tohan deui usaha pikeun nyumponan kahayang anakna. Anakna nu hayang boga blackberry cara babaturan sakolana.
“Jangeun naon atuh blackberry, Ilman?”
“Jangeun gaul atuh, Abah! Piraku batur boga uing henteu!”
“Heueuh teu nalipak manéh boga kahayang téh, da moal kabedag ku kamampuh urang!”
“Kudu pokona mah. Mun henteu dipangmeulikeun blackberry uing deuk gantung diri!”

KEUEUNG

Kénging Entjep Sunardhi
Dipidangkeun dina lapak 01 Januari 2012 20:11:08

Ahir taun limapuluhan usum werit pareng ngalantung peuting-peuting sosoranganan, keueung. Rentang-rentang ti jauhna aya nu datang ngajingjing lantera."Alhamdulillah," ceuk pikir. "Aya batur tamba keueung."
Kiwari mangsana geus aman,listrik ka sisi-sisi, sakapeung susah neangan nu poek. Tapi karisi bet beuki mokaha. Lain sieun jurig nyiliwuri tapi loba setan marakayangan salin rupa. Kamari balik neang incu kapeutingan. Leumpang di jalan nu tiiseun diwuwuh hujan ngaririncik, keueung. Satukangeun aya sora nu leumpang ngagidig, jangkung gede, buni diteregos jas hujan. "Innalillahi...muga-muga lain nu niat jahat !" gerentes hate tembus kana ucap."Duh gusti... aya batur teh tambah keueung."

SAHA ARI KURING ?

Kénging Fahry Danan Jaya
Dipidangkeun dina lapak 01 Januari 2012 19:56:26

"Nya saha ari kuring ?" Ti awit dugi ka dinten ieu asa can wanoh, ukur beja jeung pabeja-beja. Rigig jeung raga nu unggal pae babarengan weleh teu pernah ngenalkeun. Sugan di poe isukmah aya nu bisa nepungkeun "kuring" nu sabenerna.Sabab "kuring" nu sajatimah teu hayang asup ka Sawarga jeung teu sieun ku Naraka.

BEKOK

Kénging Iwan Hanjuang
Dipidangkeun dina lapak 01 Januari 2012 19:49:42

Nu tas oleng panganten salakina rek mere hadiah ka pamajikana,tapi saratna panon kudu dipeungpeuan ku lamak hideung”Kang naha make kudu dipeungpeunan atuh biasa we.Tembal salakina “ Ih da ieu mah matak pikabungaheun hadiahna oge.Belenyeng we naek taxsi muru ka hiji tempat,horeng teh imah anyar.
geus dijero ngadadak hayang hitut pamajikanana teh. Tapi era ku salaki ,Kang pangnyandakeun cai atuh abdi hanaang,sabot salakina nyokot cai,Sedut weh hitut .”Yeuh cai teh,tapi sabot nginum hayang hitut deui.”Kang gulaan atuh cai teh.Salakina indit ngagulaan,Sedut deui weh hitut tarik manan tadi.keur nginum cai gula,hayang hitut deui ngusial.”Kang kurang amis gulaan deui kang,.sabot ngagulaan deui Sedut deui weh hitut,plong weh .terus dibuka lamak nu dipake meungpeun teh,ari sihoreng didinya geus aya baraya-baraya salakina ka asup mitohana,bari buluham-belehem “Geuning aya bapa didieu teh,tos lami Pa.??Ceuk mitohana”Barang hitut ka hiji ge bapa mah tos didieu..

BEGER MINDO

Kénging Irman Nurhapitudin Dimyatie
Dipidangkeun dina lapak 01 Januari 2012 19:45:09

Sanajan diembung-embung, ditahan-tahan, jeung diulah-ulah..... naha hate bet sono bae ka ngaran Dewi? Genep kali amprok di kelas, teu boga kesan nanaon ka manehna. Tapi naha waktu patepung nu katujuh kalina di kelas, bet aya rasa? Aya geter katresna nu hese dijelaskeunana. Tepung panungtungan, nu kadalapan, kuring wakca ka manehna. Jawabna, "Abdi ridlo janten nu kadua, asal Ayah tiasa adil....!"

TAROMPET TAUN BARU

Kénging Jejen Jaelani W
Dipidangkeun dina lapak 01 Januari 2012 19:42:57

Geus jadi tradisi unggal mapag taun baru, nu ditiup teh tarompet, sabab mun niup songsong mamalana mun teu kahuruan tangtuna kapireupeunan, eta sababna tradisina niup tarompet. Saupama nu niup tarompetna Malaikat Isropil, pikeun jalma nu boga iman bakal tumanya, geus boga naon bekel bawaeun balik. Tapi mun nempo kana seremonialna, geuning urang teh ngan saukur tuturut munding bari teu nyaho naon hartina. Mun dilenyepan, horeng hirup urang pinuh ku katuna tapi embung ngaku alatan hayang disebut jalma gaul.

WEREJIT

Kénging Kaka Askara Sukma
Dipidangkeun dina lapak 01 Januari 2012 19:16:15

Ngarasa nyaah salaki asa leuwih beurat ka nu kolot, jorojoy ceuceub. Boneka nu ti ki dukun di kaluarkeun, haseup parukuyan mulek, minuhan kamarna. Sanggeus kunyam-kunyem mapatkeun jangjawokan, paku di tojos-tojoskeun, nepika boneka rangsak. "Modar siah" gerentesna. Di kamar tukang indungna adug lajer, utah getih, perlaya sapada harita.

GETER BULAN

Kénging Jejen Jaelani W
Dipidangkeun dina lapak 01 Januari 2012 18:10:52

Sareupna nu teu weleh mulas warna ngaharewos dina wirahma nu haroshos ngagentraan bulan seja wawartos, kunaon tadi wengi teu sumping? Bulan ngawaler dina galindeng ngageter, hapunten tadi wengi hiliwir angin tiis nu ngumbar katresna sareng angkeubna langit, nyieuh-nyieuh jalaran aranjeunna isin nuju ngumbar birahi

LAMBARAN ANYAR

Kénging Kus Wanda
Dipidangkeun dina lapak 01 Januari 2012 18:03:29

Poé kamari nyieun résolusi. Ditahun anyar sagalana kudu leuwih hadé batan saméméhna. Pikeun nguatkeun éta patékadan, tadi peuting milu jeung batur ngariakeun ganti taun. Mileuleuyankeun taun tukang. Mapag taun munggaran. Batina tunduh. Lambaran anyar ditaun naga dibuka ku kérék sapoé jeprét. "Akang....yeuh geura hudang. Naha moal narik, kitu?" pamajikanna ngagugujeg. "Lah...isuk deui wé narik mah. Batur mah cuti saminggu..." manéhna ngagojod deui.

TAUN ANYAR

Kénging Liman Sanjaya
Dipidangkeun dina lapak 01 Januari 2012 17:37:10

peuting ieu, di langit hibar. bruy-bray. najan sérab, manratuspasang teuteup manco. dangah bangun nu hélok. "taun anyar, taun harepan!" sora pating corowok. aweuhana siga rék ngarorocét langit nu katara alum. "taun anyar, taun kawilujengan!" sora mingkin rabeng. ngambul silihsurung. silihdéséh taya nu daék ngéléhan. kuring diuk di juru. nyawang rasa nu haben kukulisikan sajeroeun dada. karasa aya angka nu ragrag teuing ti mana. bareng reujeung daun garing katebak angin. "naha enya kitu, ieu téh taun anyar?" haté ngagerendeg. hémeng. "naon ari hartina anyar?" gerendeng deui. mingkin campuh. awor jeung aweuhan jalma-jalma nu norowéco alatan mabok. awor jeung kahusuan jalma nu munajat ngadu'a. awor jeung saban sora. "boa ukur ganti angka." ceuk pikir. kuring gagancangan cengkat. hapé disada tuluy és-ém-és dibaca; "alhamdulillah, tétéh tos babar. murangkalih katut ibuna salamet." horéng ti lanceuk beuteung. karak gé dipésakan, hapé disada deui. nu nga-és-ém-és sobat kuring; "innalillahi wa inna ilaihi rooji'uun, pun biang ngantunkeun nembé tabuh 00.06 wib."

JALMA TEU BOGA

Kénging Usep Acx
Dipidangkeun dina lapak 01 Januari 2012 17:30:45

''neng.... naon atuh nu dibanggakeun ti diri akang teh, pan eneng ge terang ku nyalira akang mah serba teu boga, eneng ge pan terang supir akang jalmi teu boga, pembantu akang jalmi teu boga, nu ngurus sawah akang jalmi teu boga, nu ngurus villa akang ge pan jalmi teu boga....... ''

MINANTU ONTOHOD

Kénging Fahry Danan Jaya
Dipidangkeun dina lapak 01 Januari 2012 17:16:20

"Abahmah di kolong langit ieu, euweuh deui pangsebelna iwal ti nempo si kunyuk ontohod urut minantu abah tea" Cek Bah Udin siga nu bener-bener ambek pisan."Ooh pedah anak abah dipirak ? wios atuh Bah da masih anom keneh mudah-mudahan we kenging jodo nu langkung sae, abah teu kenging kitu pamali isin sepuhmah kedah panjang jeujeuhan, landung kandungan laer aisan " Cek kuring satengah mapatahan." Yeuh Jang abahmah lain kulantaran si Nyai diserahkeun, mun hayang nyahomah kana kanyeri abah tah ku si Ontohod teh. Geus puguh anak abah dipangnyerikeun ulah atuh nyandungna teh ka kabogoh Abah, gelo pisan!" Cek si Abah bari ngamang-ngamang peureupna.

DOSA SAHA

Kénging Iwan Hanjuang
Dipidangkeun dina lapak 01 Januari 2012 17:02:02

Nu keur nikreuh leumpang di jalan sisi kota,aya nu nanya “Kau mau apa datang kemari” aing teu ngarti eta teh bahasa naon ? siga bahasa jaman batu dina buku-buku sajarah.
Puntén ceuk aing teh anjeun teh ngomong naon,kapaksa ngabohong we da nempo ngaran diluhur pesakna Rd Sundawan.nyél amarah naek kana sirah asa aya nu ngahina jaman ngarobahkeun uga, teu bisa disinglar ku dongeng cukrih-cukrih pucuk eurih.
Saha anu boga dosa ieu teh? ,aya hukum picis lalaunan ninggalkeun kawih”Tuh dilembur di nu lungkawing..??

JAMPE SUKSES

Kénging Risnawati Ahmad
Dipidangkeun dina lapak 01 Januari 2012 16:58:20

"Ya ampuun kang, wayah kieu ngagojod keneh. batur mah geus ber ngulon ber ngetan nyiar kipayah. ngomong we hayang jadi jalma sukses ari pagawean ngan kerek. yeuh mun hayang sukses kudu daek usaha!" Nyi Iteung ngawakwak.
"Enya Iteung, ari usaha teh dimimitian ku cita-cita, ari cita-cita dimimitian ku ngimpi, ari ngimpi apan di mimitian ku sare. nu matak akang sare wae ge, hayang sukses...."tembal si kabayan bari ngaringkuk deui.

SARJANA MELAK CAU

Kénging Edi Warsidi
Dipidangkeun dina lapak 01 Januari 2012 16:19:43

Dina hiji wanci, saurang sarjana anu jembar, naros ka Mama Ajengan. Ungal dinten Pangersa solat ka arah kiblat, naha Gusti Alloh aya di dinya?” Mama Ajengan ukur imut, teras ngawaler, ”Ungal dinten urang kedah minuhan peujit. Magrupa-rupa katuangan kedah dilebetkeun ka palebah dinya sangkan urang tiasa hirup. Naha hirup urang ukur dina peujit?” Éta sarjana ngahuleng naker pisan. Teras balik naros, ”Simkuring teu acan ngartos maksad cariosan Mama nu nembe.” Mama Ajengan ukur imut, teras ngawaler deui, ”Simkuring solat ka arah kiblat, hartosna sanes Gusti Alloh aya di palebah dinya. Simkuring teu teurang Gusti Alloh aya di mana. Sababna, upami urang salaku manusa tiasa noong tempat ayana Gusti Alloh, naon bentenna atuh manusa sareng Anjeuna? Sarengna deui, keur naon manusa kedah solat?” Teu lami nguping katerangan Mama Ajengan, éta sarjana rarayna karaos coplok. Ci socana karaos murubut. Isin kacida, rumaos jembar ku kasarjanaanna. Sujudna katinggal sapertos jalmi nu keur pepeta dina gerak ‘melak cau’. Nyeceb pisan! Singket carios, éta sarjana ngawitan deui maos palajaran iqra, wios disakelaskeun sareng murangkalih anu keur dialajar di taman alquran.

SESA KARIAAN

Kénging Herdy Mulyana
Dipidangkeun dina lapak 01 Januari 2012 16:07:44

Manehna anteng, ngumpulkeun rupa-rupa runtah nu patulayah. Diapikan hiji – hiji , lir ibarat ngumpulkeun sesa – sesa ranggeuyan pare di sawah nu ngeplak. Sidik pisan runtah teh keur manehna nyawa kadua nu manjangkeun umurna. Tina unggal runtah nu dicokot, sing terejel bayangan, jalma- jalma nu keur anteng ngaduruk duit bari susurakan jeung ajrag-ajragan. Diluhureun langit, kembang seuneu hurung herang, igel-igelan dipirig tarompet jejeritan. Kitu jeung kitu, unggal runtah nu dicokotna mere carita nu nurihan hatena.
Manehna nyakseni, kumaha rongkahna kariaan peuting tadi ngaliwatan runtah – runtah nu geus teung mangrupa. “ Sarjang, mun loba runtah nu bisa dipulungan, omat pangmeulikeun ubar keur Ema balikna,” Sora indungna nongtoreng deui ngusir lamunan nu pasuliwer na pikiran.

WANCI

Kénging Liman Sanjaya
Dipidangkeun dina lapak 01 Januari 2012 15:58:12

langit mimiti poek. tungtung desember nyangkoyot dina mega. sapanjang jalan reuteum ku lampu-lampu. girimis nganjangan bumi. nyorangan leumpang. mapay jalan nu nyorang kamelang. aya daun diragragkeun umur, ninggang kana ieu tarang. kamelang ngiwat rasa kana seuseukeut tungtung sawangan. sasoek almanak katincak. saha nu mibanda angka?

SAULAS PEUTING DI TUNGTUNG TAUN

Kénging Rudi Riadi
Dipidangkeun dina lapak 01 Januari 2012 15:09:47

Pituin urang Sunda. Sidik tina ngaranna: Cécép. Ngan pédah boga pakulitan bodas, panon sipit, katurug-turug boga usaha di sisi jalan. Mapag taun anyar, sakulawarga meuleum saté di luar. Hayamna meunang meuli di pasar Andir. Barudakna hiji séwang dibéré tarompét. Pamajikana dibéré hihid. Réang. Ramé. Seru.
Jlung-jleng tina colt buntung, para pamuda. Nyalampeurkeun. “Ko, ménta saténa, euy!”
“Sok baé ari beuki daging babi mah!” témbal Cécép bari jongjon meuleum saté. Teu loba omong, para pamuda tingtérékél deui kana colt buntung. Tarompét barudakna beuki harus. Pamajikanana beuki segut ngageberan. Réang. Ramé. Seru!

DORNA DIKAKAYA

Kénging Jejen Jaelani W
Dipidangkeun dina lapak 01 Januari 2012 14:25:52

Tos lami Resi Dorna hoyong nepangan sobatna nu tos nyangking kakawasaan di Nagri Panchala, kahoyongna laksana. Hanjakal basa dugi kapayuneun, Prabu Drupada kalah ngahina bari teras ngakaya dugi ka tanpa daksana, soca pecak panangan kengkong, malihanan nu moal hilap kana panghina sobatna nu ngahina dina basa nu teu kinten kasar garihal. "Eh, Brahmana taya kaboga, ti iraha sia jadi sobat kula, kula teu sudi boga sobat jiga gembel nu kacida hinana, yeuh dengekeun ku sia, mustahil nu teu boga sopan santun sosobatan jeung kaula, mustahil nu bodo sosobatan jeung nu pinter, mustahil hiji pahlawan jadi sobat jeung jalma kecing, memeh sia palastra ku leungeun kula, geura nyingkah ti hareupeun kula..."
Resi Dorna teu kinten nyerina, dihina bari disisia, memeh ngantunkeun Prabu Drupada nu teu kinten bengisna, Resi Dorna ngedalkeun sumpah : "He, Drupada mun andika ngarasa hina nyobat jeung kaula, kula tumarima, ngan reungeukeun ku anjeun, dina waktu nu geus tangtu kula bakal datang deui ka andika, rek nyangkalak andika sakalian ngawiwirang andika...."
Lajeng Resi Dorna ngantunkeun Prabu Drupada bari nyandak kanyerina dituturkeun ku nu janten putrana Bambang aswatama.

KULEM 2011

Kénging Abah Iseng
Dipidangkeun dina lapak 01 Januari 2012 13:37:54

Bakating ku nikmat na kulem
Beunta-beunta geus taun 2012
Kumargi kitu mangsa katukang tinggal sawangan
kumaha upami kulem deui!
Manawi iyeu sukma masih nyambung nyawa dina raga.***

RIWAN TAUN ANYAR

Kénging Neni Geo Albanjari
Dipidangkeun dina lapak 01 Januari 2012 13:35:21

Di basisir Pangandaran, mungkas raramean dina teungah peuting tadi, aya nu tingjarerit, ting salegrok, ting koceak, ting gurubug, ting haregak. " Horseeehhhh....buricak burinyay...beleduggg...duaaarrrrr....jep jempling...
Wanci qiyamul lail dareuda mentas lautan jelema nu pasolengkrah mapag taun anyar. Adzan subuh ngalanglaung semu ngalengis, nalangsa ngaliwatan ceuli ceuli nu tingjurahroh weureu sora merecon jeung sora tarompet.
Balebat kebat lumungsur teu kabengbat kunu gebrah talibra, ting kulisik teu inget kana purwadaksi. Panon poe bunceulik. Nu pasolengkrah di basisir angger anteng na riwanna impian.

Minggu, 1 Januari 2012

PANON

Kénging Rukman Ranudinata
Dipidangkeun dina lapak 01 Januari 2012 13:23:40

Tawehwoh kundang iteuk rumanggieung, nikreuh napakkeun lengkah suku, nutur2 indung suku. Nu dituju jauh tangeh kana nepi. Beurat ku tonggong, taktak dengklak taya keur dangah. Tanaga suda, maksa lengkah saka-paran2..."Aing teh can jadi aki2 pisan, tapi naha ripuh2 teuing kieu?" Manehna ngageuri jero ning batin. Sakali deui panonna dipencrongkeun ka hareup, nelek2 sugan anu ditujuna teh geus katingali...imah incuna, Nandang guru SD. Lamun geus deukeut, cenah bakal hudang sumangetna. Eh, Enya bae panonna jadi curinghak...dumadakan lengkahna jadi rada gancang bari panon terus mencrong ka hareup...ningali anu mencrang mojang denok nu keur leumpang ngalageday.

NAMU KA WEB FBS

Kénging Yusuf S. Martawidenda
Dipidangkeun dina lapak 01 Januari 2012 13:00:28

Ngupingkeun Radio Baraya Sunda Streaming, bari mukaan fikmin. Geuning Fikmin teh aya blog nu ngaarsipkeun sadaya posting naskah(1), komen(2) sareng jempol(3) mangrupi statistik. Statistikkna teh nembe dugi ka ping 5/12/11, sapertos ieu. Urutan kahiji : Jejen Jaelani W 373/684/137, Kadua : Endang Kasupardi 220/103/3, katilu : Cicara Cak 185/468/886 jst. Sim kuring urutan ka 1009 0/1/0. Naskah nu dilebetkeun kana blog teh hasil saringan atanapi otomatis

RESOLUSI 2012

Kénging Apoedy Sarah Ihsan
Dipidangkeun dina lapak 01 Januari 2012 12:50:11

Profesor asep komara anu nyunda, katingal tina namina. Nuju cindeluk di rohangan laboratorium. Piala nobel sareng penghargaan nu sanesna ngajejer pinuh. Anjeuna nuju gimir ku kaayaan dunya nu geus heurin ku tangtung. Hiji nu maot 10 borojol jadi orok. Gutret anjeuna nulis Resolusi 2012 "Ku Rekayasa Genetik, kuring deuk nyieun jelema sagede sireum".... *2.

ARTOS

Kénging Tatang Supriadi Art
Dipidangkeun dina lapak 01 Januari 2012 12:23:29

lima puluh, saratus, lima ratus, sarébu, sapuluh rébu, saratus sarébu, sajuta, samilyar, satriliun. Beunghar.
sagoéng, sapésér, sabénggol, sasén, saketip, sapérak. Taya hargaan.

HUJAN MUNGGARAN

Kénging Nanang Sahbana Afnani
Dipidangkeun dina lapak 01 Januari 2012 12:16:49

Hujan nu turun dina poe munggaran taun ayeuna matak kelar jeung katingalina asa ku geulis hujan teh."Neng..emut keneh teu salira waktos urang ngiuhan dina handapeun tangkal mahoni.? "ceuk kuring nanya ka pamajikan bari neuteup deudeuh ka manehna."Kantenan kang..! " walon manehna bari nyarandekeun sirahna kana taktak kuring."Harita akang neda ka abdi sangkan kersa dipihukum didamel prameswari pikeun maturan hirup akang "pokna deui manehna nuluykeun omonganana.Dumadak na hate aya nu ngarakacak awor jeung kamelang nu silih gentraan mairan hujan nu makin ngagedean.

HAREPAN INDUNG

Kénging Iman Nurdin M-Top
Dipidangkeun dina lapak 01 Januari 2012 11:53:39

"Jang, sing wayahna nya. Mamah teu acan tiasa ngintun artos kanggo bekel Ujang." Ceuk Si Tétéh ngomong ka kuring na telepon téh.
"Nya teu nanaon,Téh." Ceuk kuring.
"Sabaraha deui artos?"
"Lah, aya wé téh kanggo neda saminggueun deui mah."
"Nya keun atuh wayahna. Alhamdulillah, Jang, sawah Mamah anu di Rangkasbitung tos pajeng 200 juta. Kotor éta téh."
"Euleuh geuning Mamah mani tos luluasan kitu. Sagala harta banda dijarualan."
"Sanés luluasan, Jang. Pan hoyong nedunan cita-cita Apa, hoyong ka Mekah. Kanggé usaha Aa, kanggé Ujang ogé sakola. Jujur waé Tétéh mah tos teu sanggem. Tos séép."
Kuring cicing teu nyoara.
"Wayahna nya Ujang tos kedah terang ayeuna mah da tos dewasa ieuh. Ké gé mun Ujang ka lembur diwartosan geura ku Mamah. Sok wé ayeuna mah sakolana sing enya-enya kanggé bekel Ujang, ogé kanggé Mamah pan ka payunna mah.?"
Kuring angger teu nyoara. Pelenyun haseup rokok ditiup ka langitkeun.
Vodka nu kari satengah botol diuyup teu disésakeun.

UCING

Kénging Dadang Nurjaman
Dipidangkeun dina lapak 01 Januari 2012 11:39:52

Tara-tara, bet hayang madang bari sila di teras hareup. Nyaan, ni'matna pisan geuning. Hareupeun aya ucing bulu hideung meles. Soca weningna anteb neuteup. Nutug jajantung. Pangangguran, hulu peda dialungkeun ka hareupeunna. Teu ngambeu-ngambeu acan ucing teh. Kalah beuki anteb neuteup, ngan pencrongna bet karasa nungtutan alum. Cucuk peda dialungkeun, kalah mingkin alum. Sabot ngorehan alas neang naon boa nu rek dialungkeun, ucing ngaleos. Laju nyerangkeun kuring lebah juru imah. Pencrongna ngahelas ayeuna mah.

TEPUNG TAUN

Kénging Pungkit Wijaya
Dipidangkeun dina lapak 01 Januari 2012 11:21:51

Tarompet ditiup, mercon melesat ka langit, ting beledug kawas sora pestol, langit peupeus! Kembang api, warna-warni sarupa katumbiri. Idangan dina daun cau tos nyampak di buruan. Saurna tepung taun? Ah, sugan we isuk atawa pageto ge hayang salawasna, rek mapag taun!

TAMAN

Kénging Dadang Nurjaman
Dipidangkeun dina lapak 01 Januari 2012 11:21:36

Rek nyeboran pepelakan teh kagareuwahkeun ku dangdaunan gararing jeung kembang nu maluguran. Asa barala. Sareukseuk. Geus lenang disapukeun, gap kana gunting setek. Sakalian, regang-regang laleutik nu ngaganggu estetika wangun tangkal diteukteukan. Sabangsaning babadotan jeung naon boa nu ngajejembrung sela-sela ermawar, dirabutan. "Tuh, endah ayeuna mah!" gerentes hate. Bet aya hahoshos sora lebah gundukan regang jeung babadotan nu bieu diberesihan. "Kula diyugakeun ku Pangeran, naha anjeun bet tega nilas?" sora nu nandangan sakaratul maut. Gebeg.

MORO DUIT TINA FIKMIN

Kénging Jordan Kurniawan
Dipidangkeun dina lapak 01 Januari 2012 11:10:47

Alus eung buku téh ieu mah, nyaan. Judulna: Moro Duit Tina Fikmin (Situs Lokal Nu Méré Duit Gratis). Rék dibeli ah. Murah ieuh, ukur 50.000. Lumayan keur invéstasi. Sok wé geura baca. Karék daftar jadi anggota wungkul ogé, ukur ngetik email, ngeusian alamat, no rékening, jeung no Hp nu aktif na form nu disadiakeun ku Admin, urang geus menang duit 10.000. Acan mun urang komént, mostingkeun Fikmin, atawa ngajak balad. Enya, sok sanajan komént jeung mostingkeun Fikminna diwates, tina sapoé ulah leuwih ti 10 komént jeung 3 postingan. Lumayan wé dari pada online teu pararuguh mah, sabab tina sakomént ogé urang bakal menang komisi 15.000, tuluy tina saposting urang bakal menang komisi 20.000. Mun tina ngajak balad kumaha? Tah, ti dieu urang bakal menang komisi nu leuwih badagna mah, sabab ngajak balad mah teu diwatés. Tina saurang, komisina 25.000. Rék maké system 3 kaki, 7 kaki, Diamond, Gold, Jéndral, Réferal, atawa Piramida ogé bébas. Bébas pokona mah. Komisina, engké mun urang geus PayOut (5 juta), langsung dikirim kana rékening. *_*

TOROMPET

Kénging Iwan Hermana
Dipidangkeun dina lapak 01 Januari 2012 10:27:34

sapeu2ting ear di puseur dayeuh pada niupan torompet nepi ka pipi kembung ngabdadagan, teu katinggaleun nini olot oge milu niup torotototan, pipi peot ngadadak kembung siga balon, pok nini ka incuna : ke uink heula niupna budak mah ngadengekeun sorana be pan nini mah sing satarikna nu niup torompet ge angger teu kadenge .... dijawab ku incuna eumh nini torototheong

BASISIR CISOLOK

Kénging Jejen Jaelani W
Dipidangkeun dina lapak 01 Januari 2012 09:12:24

ti lebah sela-sela dangdaunan aya nu tingkeresek, jul-jol, tingrengkenek, jlung-jleng laluncatan aksara-aksara vokal jeung konsonan, ngabaris jadi ungkara pinuh kabungah, ngukir angkeubna langit, mulas mega handapeun giwangkara, na tungtung lambak jeung ombak aya budah tingborelak, noelan jungkiringna karang, nya didinya lebah mumunggang karang, salira ngadeg dina imut manis bari ngagupay-gupay rasa ku katresna

KADUHUNG

Kénging Iwan R Jayasetiawan
Dipidangkeun dina lapak 01 Januari 2012 09:09:03

Masing daek getek salelembur,kuring kaduhung,teu gagade nyarande ,nganyuk ngahutang neangan bekel ke ka Tamansari Bandung.Nyi Rengganis nu geus maheutkeun janji jeung kuring rek meakeun peuting di basisir Laut Kidul,teu jebul datang.Kaduhung daek dilojokeun ku Kang Jejen,oge Kang Irman.Pajarteh Nyi Renggani mah tara sulaya kana janji. Ari pek teh impo jonglok lah.

SESA PESTA

Kénging Mamat Supriatna
Dipidangkeun dina lapak 01 Januari 2012 09:07:06

Tarompet kardus kagencet tumpukan tolol jagong. Nguniang bari humarurung, “Duh awak pasiksak, ditiupkan sataker kebek nepi genggerong soek. Mun geus kieu kumaha deui?” Tolol jagong reang nembalan, “Komo kami balas dibeuleum, disegetan, dibalangkeun. Teu puguh kujur!” Bangun embung eleh, gagang kembang api nempas, “Meugeus barina oge! Dewek mah bujur diduruk, awak jeung sirah bencar pikeun kagumbiraan manusa!” Sabot silih tempas, ruhak sesa ngadurukan anteng meuleum runtah sesa pesta sekalian jeung dirina.

Cimahi, 01012012, (Ahad tabuh 09:05)

1 JANUARI

Kénging Apoedy Sarah Ihsan
Dipidangkeun dina lapak 01 Januari 2012 08:49:24

Sirah masih asa misah keneh tina waragadna. Sesa anggur beureum tadi peuting masih ngaburkeun pangacian. Ret ka beh kenca tonggong taranjang nu rada katutup simbut, teuing saha..!. Taun anyar... Dosa anyar... *1.

HEPI NU YER

Kénging Maman Damiri
Dipidangkeun dina lapak 01 Januari 2012 08:19:44

Tereteeeetttt tetet toet , jegur paralak,jegur paralak.Jep simpe!

MAYA ARMAGEDON_1

Kénging Cassa Grande
Dipidangkeun dina lapak 01 Januari 2012 07:55:32

"Ngarana Maya." Sahaboa. Dina kotak nu keur anteng dipencrong. Almenak coplok.
Perang campuh dina jam-jam panungtung, kiwari réhé. Sepi combrék...! "Teu Uyahan" Pikir Opan. Nu Perang muru laut, aleut-aleutan, ceuk Begawan dina télévisi. Di Gunung, Rahayat Kota tumpur tutas ngalung-ngalungkeun seuneu rupawan ka langit. Majar Jawara. Maya nguniang, neuteup wiwitan satumbakan Matapoé "Armagéééddooooonnn..." Sorana nongtoréng, meupeueskeun tarompét nu pasoléngkrah dina sirah.

HEBAT

Kénging Usep Acx
Dipidangkeun dina lapak 01 Januari 2012 07:35:45

emid :hebat bapa uing mah euy taun anyar teh boga mobil anyar
emed : nya hebat keneh bapa uing atuh taun anyar teh boga imah anyar.
emod : eleh kabeh ge ku bapa uing mah.
emid+emed : na kumaha kitu kahebatannana
emod : bapa uing mah taun anyar teh boga pamajikan anyar, tapi indung uing teu apaleun...... hebata nya !!!

NURUG CUPU

Kénging Suyud Kusdinar
Dipidangkeun dina lapak 01 Januari 2012 07:30:28

Hujan ngaririncik, suluh baseuh, haseup mulek, sangu gigih kénéh, beuleum peda dirontok ku ucing tatangga. Budak ngagoar hésé répéh, indungna jamedud. Rokok tinggal sabatang, kopi sasendok deui, gula kawungna digembrong sireum

PEUTING PAMAPAG TAUN

Kénging Rohendi Pandeglang
Dipidangkeun dina lapak 01 Januari 2012 07:08:38

Deuleu, basisir pinuh, macet, heurin usik.
Lambak carita, kiruh mangpirang nirca.
Angin, eureun hiliwirna, kapegat hegak barudak ngora, di handapeun tangkal, dina rungkun sapanjang basisir, dina luhureun motor nu distandarkeun.
Bentang, nyumput, sieuneun, ruhayna kembang api nyogokan langit.
Owa pasir putih, sing cikikik, aratoh jasa, nambahan baturna, dina taramna taun anyar.

WARNA

Kénging Jejen Jaelani W
Dipidangkeun dina lapak 01 Januari 2012 06:42:40

Sajongjonan, endahna warna-warni sumarambah ka sakujur raga, ngeleter kana rasa, hanjakal ngan sakolepatan, ilang dina panineungan nu simpe. Ah... kunaon ingetan bet ngadadak poho deui

BUDAK SAKOLA

Kénging Iwan Hanjuang
Dipidangkeun dina lapak 01 Januari 2012 01:57:28

- Usep cik atuh balik sakola teh ganti heula baju,ieu kalah dér weh maen PS.
+ Kapameng mamah ieu aya game enggal nu rerencangan.
- Bantuan heula atuh mamah nya da bageur,ka warung heula nya meser kecap,
ke diburuhan sarebu..
+ Ah ku mamah we nyalira atuh, ke ku usep mamah dipasihan dua rebu...

WILUJENG KANTUN 2011

Kénging Jejen Jaelani W
Dipidangkeun dina lapak 01 Januari 2012 00:30:46

pepedut nyaput langit kulawu, mongkleng nyimbutan peuting, girimis ipis muruhpuy deui, maseuhan wahangan jalan, mupus tapak lacak nu tinggaleun lebah kasimpe nu mepende hate lebah nguyumbangna cileuncang